दुहबी। लामो समय देखि विवादमा रहेको विराटनगर–धरान सडक खण्ड अन्तर्गत सुनसरीको दुहवी बजारको मुख्य भागदेखि उत्तर र दक्षिणतर्फका घरटहरा भत्काउन थालिएको छ ।
नगरपालिकाले बजार क्षेत्रसँगै आसपासको जग्गा खाली गर्न दिएको अन्तिम समय शुक्रबारबाट सकिएपछि शनिबारदेखि घरटहरा भत्काउन थालिएको हो । जग्गा खाली गर्ने क्रममा स्थानीयवासीले अवरोध गर्ने प्रयास गरेपछि वडा नं. ५ र ६ का वडा अध्यक्षले नेतृत्व गरेर प्रहरीको बाक्लो उपस्थितीमा डोजर प्रयोग गरि भत्काइएको छ । नगरपालिकाले जग्गा खाली गर्न यसअघि पटकपटक आग्रह गर्दा पनि अटेर गरेपछि अन्तिम पटकलाई शुक्रबारसम्म समयसिमा तोकिएको थियो । तर, तोकिएको समयसिमा भित्र पनि घर र टहरा भत्काउन अटेर गरेपछि नगरपालिकाको अगुवाईमा भत्काउन थालिएको हो ।
दुहवीको बजार क्षेत्रमा १६ दशमलव ४६ मिटर मात्रै सडक चौडा गर्ने सहमती भएको छ । बसोबास बाहेकका स्थानमा भने ३० मिटर खाली गराउने सहमती भएको हो । सहमती अनुसार ६ लेन सडक विस्तारका लागि दुहवीको मुख्य बजार क्षेत्र बाहेक गंगादेवी लुनाकरण दास च्यारेटी हस्पिटलको क्रसिङ् रोडदेखि दक्षिण र इनरुवा रोडको क्रसिङ् उत्तरतर्फको सात–सात सय मिटर उत्तर सडक विस्तार गर्न जग्गा खाली गरिएको हो ।
दुहवीमा सरकारले २०५४ सालमै ६३० मिटर क्षेत्रलाई विल्टअप क्षेत्रको रुपमा कायम गर्न निर्णय गरेको थियो । त्यतिबेला २०५४ चैत ३ गते राजपत्रमा प्रकाशित सूचना अुनसार, दुहवी बजार क्षेत्रमा सीमा सडकको केन्द्र रेखादेखि बायाँ–बायाँ दुवै तर्फ २७–२७ फिट मात्र कायम गरिएको थियो । दुहवीको मुख्य बजार क्षेत्रबाहेक उत्तर र दक्षिणतर्फको एक हजार ३ सय ५० मिटर ठेक्का लागेको छ ।
लामो समयदेखि स्थानीयको अवरोधको कारण दुहबीमा मात्रै सडक विस्तारको काम अवरुद्ध हुँदा रानी देखि धरान सम्मको सडक निर्माण कार्य ८० प्रतिशत मात्रै सम्पन्न भएको छ । आयोजनाको काम अघि बढ्न नसके पछि गत पुष २६ गते धरान–विराटनगर सडक आयोजनाले दुहवी नगरपालिकालाई पत्राचार गरी सडक किनारका घर टहरा हटाइदिन आग्रह गरेको थियो ।
पछिल्लो समय सडक निर्माणका लागि २०८० सम्म समय अवधि थपिएको छ । पुरै सडक निर्माण गर्दा शुरुवातमा १० अर्व ९८ करोड लागत अनुमान गरिएको थियो ।
