झापा/ झापा जिल्ला ट्राफिक प्रहरी कार्यालयले मादक पदार्थ सेवन गरी सवारी साधन चलाउने ४,६०७ जनालाई कारबाही गरेको छ। पछिल्लो समय ट्राफिक प्रहरीले मापसे जाँचमा कडाइ गरेसँगै मादक पदार्थ सेवन गरेर सवारी साधन चलाउनेको संख्यामा उल्लेखनीय कमी आएको जनाइएको छ। जिल्ला ट्राफिक प्रहरी कार्यालय झापाका वरिष्ठ प्रहरी नायव निरीक्षक अर्जुन सोडारीले तीन वर्षको अवधिमा मापसे गरेर सवारी सञ्चालन गर्ने व्यक्तिहरूमाथि कारबाही गरिएको जानकारी दिए।
उनका अनुसार, आर्थिक वर्ष २०७९/०८० मा ११७ ट्रक, १० बस, ३१२ कार, जिप र भ्यान, २४५ ट्याक्टर, १,२१९ मोटरसाइकल, र १९३ टेम्पो तथा अन्य सवारी साधनका चालकलाई मादक पदार्थ सेवन गरेको अवस्थामा कारबाही गरिएको थियो। आर्थिक वर्ष २०८०/०८१ मा ५४ ट्रक, १ बस, ४१५ कार, जिप र भ्यान, १२१ ट्याक्टर, १,३११ मोटरसाइकल, र १६२ अन्य सवारी साधनका चालक मापसेको अभियोगमा कारबाहीमा परेका थिए। चालू आर्थिक वर्ष २०८१/०८२ को असोज महिनासम्ममा ३० ट्रक, ११३ कार, जिप र भ्यान, २३ ट्याक्टर, २५४ मोटरसाइकल, र २७ टेम्पो तथा अन्य सवारी साधनका चालकलाई कारबाही गरिएको प्रहरी वरिष्ठ नायव निरीक्षक सोडारीले बताए।
ट्राफिक प्रहरीले मापसे जाँचमा व्यापक सफलता प्राप्त गरेको बताइए पनि लागूपदार्थ सेवन गरी सवारी चलाउने क्रम भने बढेको आशंका गरिएको छ। एक वर्षअघि लागूपदार्थ सेवन (लापसे) जाँच अभियानको रूपमा शुरू गरिएको भए पनि, स्रोत-साधन र प्राविधिक कठिनाइका कारण यो अभियानलाई प्रभावकारी रूपमा अघि बढाउन कठिनाइ रहेको बताइएको छ। चालू आर्थिक वर्षको असोजसम्ममा ४५ जनालाई लागू पदार्थ सेवन गरेको अवस्थामा कारबाही गरिएको जनाइएको छ। सोडारीका अनुसार, मापसे जाँचमा जस्तो सबै चालकहरूलाई जाँच नगरी शंका लागेका व्यक्तिहरूमाथि मात्र परीक्षण गरिएको छ। लापसे जाँचमा प्रयोग हुने एउटा उपकरणको मूल्य झन्डै १,४०० रुपैयाँ पर्न सक्ने बताइएको छ।
प्रदेश सरकारले आवश्यक किट उपलब्ध गराएमा काँकरभिट्टा क्षेत्रमा लापसे जाँचलाई व्यापक बनाउन सकिने सम्भावना रहेको प्रहरीले जनाएको छ। वनभोजको समय नजिकिएसँगै झापाका विभिन्न स्थानबाट अन्यत्र वनभोजमा जानेहरूको संख्यामा वृद्धि हुने भएकाले, यस समयमा हुने सवारी दुर्घटना न्यूनीकरणका लागि विशेष चेकजाँच अभियान चलाउने तयारी गरिएको छ। सम्भावित दुर्घटना क्षेत्रमा निगरानी बढाउने योजना समेत रहेको जनाइएको छ।
जिल्ला ट्राफिक प्रहरी कार्यालय झापाका प्रमुख प्रहरी निरीक्षक गणेश पौडेलले सबैलाई मापसे गरेर सवारी सञ्चालन नगर्न आग्रह गरेका छन्। साथै, चालकले मापसे गरेको थाहा पाएमा तत्काल नजिकैको प्रहरी कार्यालयलाई जानकारी दिन उनले सुझाव दिएका छन्। वनभोजको समयमा हुने सम्भावित दुर्घटना न्यूनीकरणका लागि राजमार्ग क्षेत्रमा विशेष निगरानी थप्ने तयारी रहेको ट्राफिक प्रहरीले जनाएको छ।
पछिल्लो समय पूर्व–पश्चिम महेन्द्र राजमार्गको स्तरोन्नति गर्ने काम भइरहेकाले, सडकका दायाँ–बायाँका संरचना भत्काउँदा सवारी सञ्चालनमा विशेष सतर्कता अपनाउन ट्राफिक प्रहरीले सबैलाई आग्रह गरेको छ। ट्राफिक प्रहरीले जनपद प्रहरीसँग मिलेर संयुक्त रूपमा चेकजाँच गर्ने काम गरिरहेको र सीमित स्रोत-साधनका बाबजुद धेरैलाई कारबाहीमा ल्याउन सफल भएको तथ्याङ्कले देखाएको छ।
झापामा केवल तीनवटा ब्रेथ एनलाइजर उपलब्ध हुँदा र जनशक्ति सीमित भएका कारण पनि सवारी चेकजाँचमा कठिनाइ हुने बताइएको छ। हाल साँझको समयमा मात्र मापसे चेकजाँच चलाइएको भए पनि, परिस्थिति र आवश्यकताअनुसार समय परिवर्तन गरी चेकजाँचको दायरा बढाउन सकिने ट्राफिक प्रहरीले जनाएको छ।
