मोरङको सुन्दरहरैँचामा जंगली हात्ती मृत फेला परेको छ ।
सुन्दरहरैँचा नगरपालिका ६ दुर्गा मन्दिर टोलनजिक भक्तराज लिम्बूको केरा बगानभित्र जंगली हात्तीको छावा (बच्चा) मृत फेला परेको हो।
भाले जातको छावा बुधबार बिहान ६ बजेतिर मृत अवस्थामा भेटिएपछि स्थानीय र जनप्रतिनिधिले वन कार्यालय तथा प्रहरीलाई खबर गरेका थिए। सव डिभिजन वन कार्यालय लाटीझोडा एवं सव डिभिजन वन कार्यालय सलकपुर र प्रहरी चौकी गछियाको टोली अहिले घटनास्थल पुगेर मुचुल्का उठाउने काम भइरहेको छ ।
लाटीझोडा सब डिभिजन वन कार्यालयका प्रमुख एवं अधिकृत अमृतविलाश पन्तले वन कर्मचारी र प्रहरीको संयुक्त टोली घटनास्थललाई सुरक्षित राखेको जानकारी दिए ।
उनका अनुसार अन्दाजी ६-७ वर्षको जस्तो देखिने हात्तीको बच्चा केरा बगानभित्र मृत फेला परेको हो । पोस्टमार्टम र थप अनुसन्धानबाट मात्रै मृत्युको कारण यकिन हुने पन्तले बताए ।
