गोरखाका सिरानचोक गाउँपालिका र गोरखा नगरपालिकाका केही क्षेत्रमा यस वर्ष पनि “पर्व सुधार” भन्दै भदौमै दशैं मनाइएको छ। भदौ ९ गते राखिएको जमरालाई टिका सहित प्रयोग गर्दै विभिन्न ११ स्थानमा दशैं मनाइएको हो। मानव अधिकार तथा सामाजिक रुपान्तरण अभियानका सचिव किशोर रेग्मीका अनुसार ०६९ सालदेखि नै ज्योतिषीय गणनाका आधारमा अन्य ठाउँभन्दा केही अघि पर्व मनाउने गरिएको छ। पर्व सुधार समन्वय समितिको अगुवाइमा सदरमुकामको राधा बल्लभेश्वर मन्दिर, सिरान्चोकको छोप्राक, पालुङ्टारका विभिन्न स्थान र खोप्लाङमा जमरा राखी विद्यार्थीहरूलाई समेत टिका–जमरा लगाइएको समितिका अध्यक्ष तुलसा मरहट्टाले जानकारी दिइन्।
