काठमाडौं– मेडिकल कलेजहरुमा देखिएको शुल्कको विवादको विषयमा नेपाल मेडिकल काउन्सिलले छानबिन गर्ने भएको छ ।
काउन्सिलले एक विज्ञप्ती जारी गर्दै छानबिन समिति बनाएर समस्याग्रस्त मेडिकल कलेजहरुमा स्थलगत अनुगमन गरी दोषी देखिएकाहरुलाई कारबाहीको पहल गर्ने जनाएको हो ।
शुल्क फिर्ताको माग गर्दै आन्दोलन गरेका विद्यार्थीहरुमाथि कुटपिट भएको र बन्धक बनाएको भन्दै काउन्सिलले त्यसतर्फ आफ्नो गम्भिर ध्यानाकर्षण भएको जनाएको हो ।
विद्यार्थीसँग सरकारले तोकेको भन्दा बढी शुल्क लिएर उनीहरुमाथि आर्थिक, मानसिक र विभिन्न प्रकारको शोषण तथा कुटपिट र बन्धक बनाइनु अमानवीय भएको काउन्सिलको ठहर छ ।
काउन्सिलले विज्ञप्तीमाफर्त तत्काल समिति बनाएर तीन प्रमूख कार्य गरिने जनाएको छ ।
काउन्सिलले समिति बनाएर मेडिकल कलेजहरुमा स्थलगत अनुगमन गरी दोषी देखिएकाहरुलाई कारबाहीको लागि चिकित्सा शिक्षा आयोगलाई सिफारिस गर्ने, शान्तिपूर्ण आन्दोलनमा उत्रेका विद्यार्थीहरुलाई कुटपिट गर्ने, बन्धक बनाउने, डर त्रास र धम्की देखाउने लगायतका विषयहरुमा मेडिकल कलेजका सञ्चालक प्राचार्य तथा प्रशासकीय पदाधिकारीहरुसँग स्पष्ट बुझि आवश्यक कारबाही प्रक्रिया अगाडि बढाउन आयोगमा सिफरिस गर्ने जनाएको छ ।
यस्तै चिकित्सा शिक्षा र चिकित्सा व्यवसायसँग सम्बन्धित हरेक समस्या, जटिलता तथा सम्भावनाहरुलाई सम्बोधन गर्ने जनाएको छ ।
