धरान । आगामी मंसीर १४ गते हुने उपनिर्वाचन बहिस्कारको आन्दोलनमा उत्रिएका ९ जनालाई धरान प्रहरीले पक्राउ गरेको छ । यही मंसिर १४ गते धरान उपमहानगरपालिकाको प्रमुखका लागि उपनिर्वाचन हुँदैछ ।
धरानको छाता चोकमा रहेको पुरानो अस्पताल क्षेत्रमा भेला भई उपनिर्वाचन बहिष्कारको लागि कार्यक्रम गर्ने तयारी गर्दैगर्दा उनीहरुलाई पक्राउ गरिएको इलाका प्रहरी कार्यालय धरानका प्रमुख डिएसपी ढुण्डीराज न्यौपानेले बताए ।
प्रहरीका अनुसार उनीहरुको साथबाट एउटा साउन्डबक्स, एउटा वारलेस माईक, सिपी गजुरेल अध्यक्ष रहेको देशभक्त जनगणतान्त्रिक मोर्चाको १५ थान पर्चा पनि बरामद भएको छ ।
उनीहरु मोर्चाको कार्यकर्ता रहेको प्रहरीले जनाएको छ । पक्राउ परेका मध्ये ३ जना केन्द्रीय सदस्य र ६ जना प्रदेश सदस्य रहेको बताईएको छ । संसदीय उपचुनाब बहिस्कार गरौं, संघीय गणतन्त्रको दिशामा अघि बढौ भन्ने नाराका साथ उनीहरुले उप निर्वाचन बहिस्कारको कार्यक्रम गर्न लागेका थिए ।
पक्राउ परेका सबैलाई आज अभद्र व्यवहार ऐन अन्तर्गत मुद्दा दर्ता गरी कारवाही प्रकृया अगाडी बढाइएको डिएसपी न्यौपानेले बताए ।
