हङकङमा सरकार विरोधी आन्दोलनमा उत्रिएको आरोपमा प्रहरीले दुई नेपाली चेलीलाई पक्राउ गरेको छ । जेनी राई र रोजमेरी लिम्बूलाई प्रहरीले याउमातेइबाट पक्राउ गरेको हो ।
अध्ययनका लागि हङकङमा रहेका उनीहरुलाई पक्राउपछि हुङहोम र चेङ सा वान प्रहरी स्टेशनमा राखिएको छ । पक्राउ परेका उनीहरुसँग कसैलाई भेट्न नदिइ बाँधेर राखिएको छ। यस विषयमा हङकङस्थित नेपाली महावाणिज्य दूतावासलाई समेत जानकारी दिइएको छैन ।
हङकङका विश्वविद्यालयमा अध्ययनरत अन्य देशहरुका विद्यार्थीहरुलाई पनि प्रदर्शनमा उत्रिएको आशंकाकै भरमा प्रहरीले पक्राउ गर्ने र चरम यातना दिने गरेको छ ।
बेइजिङको आदेशमा तुलनात्मक स्वतन्त्रताको उपयोग गर्दै आइरहेको हङकङमा सरकारी नियन्त्रण बढाउँदै लगिएको छ । पछिल्लो समय चीनको इसारामा प्रदर्शनकारीमाथि अत्याधिक बल प्रयोग गर्ने र पक्राउ परेकामाथि प्रहरीले चरम यातना दिने गरेको छ ।
हङकङमा प्रहरी र प्रजातन्त्र पक्षधर प्रदर्शनकारीहरूबीच पछिल्लो समय हिंसात्मक झडपहरू समेत भएका छन् । प्रजातन्त्रको माग गर्दै प्रदर्शनकारीले झण्डै १८ औं सातासम्म प्रदर्शन चर्काइरहेका छन् ।
केहीदिन अघि विद्यार्थीहरूको नेतृत्वमा अम्ब्रेला मुभमेन्ट भनिने आन्दोलन भएको पाँच वर्ष पुगेको अवसरमा दशौं हजारले सडकमा प्रदर्शन गरेका थिए ।
