विराटनगर । मोरङमा सवारी दुर्घटना न्यूनीकरण तथा ट्राफिक व्यवस्थापनलाई प्रभावकारी बनाउने उद्देश्यले विभिन्न स्थानमा जेब्रा क्रसिङ निर्माण गरिएको छ।
इलाका प्रहरी कार्यालय नेमुवा र इलाका प्रहरी कार्यालय हरैचाको पहलमा ट्राफिक प्रहरी, स्थानीय तह र जनप्रतिनिधिको सहकार्यमा बुढीगंगा गाउँपालिका–४ र ग्रामथान गाउँपालिका–७ हरैचामा जेब्रा क्रसिङ बनाइएको हो।
पैदल यात्रुको सुरक्षित आवतजावत सुनिश्चित गर्न र सवारी चालकलाई ट्राफिक नियमप्रति सचेत गराउने उद्देश्यले अभियान सञ्चालन गरिएको प्रहरीले जनाएको छ। सडकमा जेब्रा क्रसिङ स्पष्ट नहुँदा पैदल यात्रु जोखिममा पर्ने भएकाले प्राथमिकताका साथ रेखांकन गरिएको बताइएको छ।
स्थानीय निकाय, प्रहरी र जनप्रतिनिधिको संयुक्त प्रयासमा सडक सुरक्षा सचेतना कार्यक्रमलाई निरन्तरता दिइने जनाइएको छ। आगामी दिनमा दुर्घटना सम्भावना बढी भएका स्थान पहिचान गरी ट्राफिक संकेत, जेब्रा क्रसिङ तथा सचेतनामूलक गतिविधि थप प्रभावकारी बनाइने बताइएको छ।
