खोटाङ । डिभिजन वन कार्यालय खोटाङले अवैध रूपमा निकासीको तयारीमा राखिएको उत्तिसका चार ट्रक गोलिया काठ बरामद गरेको छ । दिक्तेल रुपाकोट मझुवागढी नगरपालिका–९ निर्मली डाँडा र साकेला गाउँपालिका–१ बाँझेच्यानडाँडाको सीमामा पर्ने साप्सुखोला किनारबाट काठ बरामद गरिएको हो ।
स्थानीयले दिएको सूचनाका आधारमा वन कार्यालयले निरीक्षण गर्दा काठ निकासीको तयारी भइरहेको भेटिएपछि कर्मचारी परिचालन गरी तीन दिन लगाएर काठ नियन्त्रणमा लिइएको डिभिजन वन कार्यालय खोटाङका प्रमुख राजन राईले बताए । उनका अनुसार प्रारम्भिक अनुसन्धानका क्रममा आवश्यक अनुमति नलिई रुख कटान गरी काठ निकासी गर्न खोजिएको देखिएको छ ।
घटनाको विस्तृत अनुसन्धानका लागि वन कार्यालयले समिति गठन गरेको छ । समितिको प्रतिवेदनका आधारमा थप कानुनी प्रक्रिया अघि बढाइने जानकारी राईले दिए ।
